Neuapostolische Kirche
Kirchenbezirk Dornhan/Villingen-Schwenningen
-
Seelsorge
-
Gemeinschaft
-
Im Kirchenbezirk
-
Dr Gsangverei' Taufe, Haohzich oder Leich - wa ma' feiret, sell ist gleich, d Hauptsach ist ond bleibt debei neabem Pfarr dr Gsangverei'! Becke, Metzger, Schuaster, Schneider, dicke Wiit ond Hongerleider, Apotheker ond Kanditer, Leichesäger, Haohzichbitter, Küafer, Ipser, Kemmigfeager, Feadrefuchser, Heiligepfleager, Stadtakziser, Fleischbeschauer, Kupferschmied ond Feilehauer, Wengeter ond Kappemacher, jonge Spritzer, alte Kracher, alles ist em Gsangverei' - so muaß sei'! D Hauptsach aber konnt am End: ao dr schö'gst Verei', wa war r aohne reachte' Dirigent, aohne de' Herr Lehrer? So e Ma' konnt et zom Gruabe', dear ist überlengt s ganz Johr: tagsüb haut r d Schulerbuabe', obneds hot r Kirchechor, Gsangverei' ond Geigestonda', sonntigs orgle' en de Kerch - narr des Gschäft macht ao en Gsonde' rabiat ond überzwerch.
Älle standet uf me' Haufe', jeder huastet nohmal gschwend, aber wenn dr Dirigent mit em Taktstock s Zeiche' geit, guck, noh traut se koar maih z schnaufe'- passet uf, iatz isch soweit: Wia fahret dia Mäuler sperrangelweit uf, wia juzget dia Manne' ond kommet et nuf! Vo' onne' ruf brommlet wia aus me' Faß ganz tiaf ond hohl e Bierbrauersbaß. Dr Dirigent ist ganz verboge', es platzt em schier sei' Brotesrock, r schleglet mit de Eleboge’ ond fuchtlet mit seim Stock. Iatz leget se laos, iatz ist enes gleich: wia zittret dia Schnauzbärt, wia wacklet dia Bauch! Se senget so schö' ond se senget so laut, se senget vom Rehlein ond »Wers uns getraut« ond machet ganz spitzige Mäule’; se klagnet, se häbe koa' Schätzele maih, ond s wuud ene' selber ganz wend ond waih ond am liabste' tätet se heule' . . . So e' Gsang goht oam ufs Gmüat. Aber was ist s End vom Liad? Daß se duustig send ond müad. Dorom täts em Gsangverei' deane Manne et so gfalle', käm et noh dehennedrei', ällemol e Balle'.
(Sebastian Blau)